مساء الخير،
أرسينك Arsenik
بخصوص إننا مش بتوع مشاعر وتعاطف إلا في الضرورة القصوى
.
وفكرة إننا مجرد ناس بتعرض الملفات ال
RAW
اللي بجد،
مش الراو الل بتتكلم عنه ناس محدثين.
هنقول الرأي الفصل الخاص بينا وطبعًا بندعم كفة الرابر حتى لو هو غلطان ضد أي منظومة أو كوربوريت مستحيل حد يكسبها بمجرد ستوري أو شتيمتين أو هاشتاج ودرويلة من دي .
هل أرسينك غلطان؟ أيوة غلطان
هل أرسينك يقدر يجيب حقه ويصلح غلطته؟ أيوة وبأسرع وقت إحنا مش هنتكلم في القانون هنا أونلاين ولا هنناقش المواد القانونية والدستور زي ما مع الأسف معظم الشعب بقى يعمل في آخر كام شهر. الشعب المصري بيحب التحليلات والتدريس جدًا هههه
*هنقول كام نقطة ودي مجرد دلايل وحاجات دامغة لقطناها ولميناها أثناء متابعتنا للشركة المشبوهة دي من فترة*
1) الشركة تحت بير السلم
2) الشركة عملت حاجات شبيهة مع رابرز زي كريم مدحت
3) كريم مدحت قال في كلامه إن الناس اللي ماسكين الشركة بيعملوا حاجات
خارجة وبيدعوا عكسها
4) أرسينك مضى العقد قبل ما يكمل ال21 ودي حاجة تنقذه بكل سهولة لو العقد فيه أذى أو ضرر عليه، لكن العقد تمام وهيشتغل وكل حاجة هتفضل زي ما هي لو العقد بيفيد أرسينك وبينفعه وهو مش متأزم ولا بيشتكي. يعني طول ما هو تحت ال21 يقدر يروح لمحامي أو مكتب محاماة ويطلب المساعدة وهم هيساعدوه طالما هو مضى العقد قبل وأثناء ما هو تحت 21
5) أرسينك كان ممكن يعمل زي كريم مدحت ويخلع قبل ما رجله تغرز لكن هو وفي وعنده اجتهاد نوعي وبيقدر ينغمس تمامًا في الشغل، لكن هو وقع مع ناس هلاسين. وحرام رابر بالمستوى ده يقعد سنتين في البيت عشان شوية شمامين
6) الشركة سيئة النية وسهل إثبات ده بسهولة، والموضوع مش هيخش محاكم تقيلة وممكن ببساطة يخلص وينتهي في محكمة اقتصادية أو عند المحامي بالتراضي..ف مايخافش يعني ومايقلقش
7) الشرط الجزائي مش هيبقى عبء عليه طالما قدر يثبت إنه لم يتخاذل
8) ماحدش في الراب سين لحد دلوقتي عنده التقل القانوني والحيثية اللي تسمح له بإنه يقف قصاد الشركات المشبوهة دي لإن السين معظمه ناس مرتزقة وبتوع شو وتعاطف وكلام كلام كلام كلام وسبوبجية وشباب من بتوع الشعر الكيرلي والصبغة.
الموضوع في الشارع وعلى أرض الواقع مالوش تقريبًا وجود إلا في الكازينوهات والسماعات.
9) نصر محروس وفري ميوزك ماقعدتش بهاء سلطان وهيثم شاكر وغيرهم في البيت خمس وعشر سنين إلا لما عرفوا إنهم طيبين وعلى نياتهم وفنانين بس. لكن واحد زي تامر حسني وشيرين عرفوا يلموا نفسهم ويبقوا نجوم صف أول بعد ما اكتشفوا اللي بيحصل بدري بدري
10) العملية الإنتاجية مش صورتين بقلم وورقة مع واحد في شقة إيجار تحت بير السلم
11) الكام ألف والعقد اللي بالألوان والشقة اللي فيها ديكور حلو دي والكام ألف سبسكرايبر مش هم كل حاجة
12) طالما ماعندكش حد يحميك(محام) ولا عندك القدرة على الاستعانة بالخبرات القانونية وإنك تدفع فلوس بشكل شهري لمكتب محاماة أو إنك تشتغل مع محامي يبقى هتفضل خايف ومستني الفعل عشان تبقى انت رد الفعل بس. طالما لعبت الدح ماتقولش أح
13)لو حسيت إننا بنقسو على حد ف طبعًا مش شماتة والناس عارفة كده، لكن غيظ وغضب من الدخلاء ع الثقافة.
14) الدخلاء مش مستمعين بس الدخلاء منتجين مشبوهين وشركات تحت بير السلم ومرتزقة وشمامين كوله وناس هليبة
15) اللي حصل مع أرسينك كان هيحصل مع غيره لإن المجال كل ما يتوسع كل هتزيد مشاكله... كل حاجة وليها ضريبة
16)
الناس كانت فاكرة الموضوع مكسب بس... طب وفين الضحايا؟
17) لو لقيت كل حاجة سالكة والدنيا جميلة، لازم تقلق. لإن كل شيء وليه ضريبة
18) بندعو أرسينك للذهاب لمحام أو مكتب محاماة وشؤون وخبراء قانونيين في أسرع وقت لإن كل ما الموضوع نام اكتر كل ما بقت فرصته في إنه يسترد حقه والحصول على تعويض هتتلاشى وتقل.
19) لازم الثقافة القانونية واللي هي الاستعانة الدايمة بالمحامين والخبراء القانونيين تكون موجودة عند أي حد بيشتغل في أي مجال من أول دلوقتي وطالع
20) كل الدعم الحقيقي والشفاف والعملي واللي من غير عياط ونواح ولقطة
لأرسينك ولكل أرسينك
تحياتنا للجميع وكونوا أقويا
المحتوى هو أرشيفي بالكامل. لو في أي شيء يخصك ومش حابب إنه يظهر تواصل معانا فورًا وهنحذفه. إحنا مش قاصدين نرخم على حد. شكرًا ليك
...