(البوست هيكون مترتب على حسب الأقدمية والأعمار وكل واحد كان عنده كام سنة لما رحل عننا..بوست حزين شوية)
يوسف موكا باتل راب، ميدو إبليس مؤسس أليكس ديفلز وخليفة دا كانون مؤسس الجي إم سي...
في ناس عملوا بصمة في الراب سين المصري ورحلوا عن عالمنا لمكان أحسن بكتير،
الأول كان مؤسس لإحدى أقوى الحركات في الهيب هوب المصري وهو خليفة دا كانون مؤسس جماعة الجي إم سي واللي كانت بتنافس السي سي جي على السطوة والنفوذ في مدينة القاهرة. كان من ضمن الجي إم سي ديابلو دي بي أو الديبو وده كان رابر مميز جدًا جدًا وفنان شامل وراقي بحق... لكن هو اختار يمتنع وآثر الصمت.
التاني هو ميدو إبليس، أحد مؤسسين الجيل التاني والتالت في الهيب هوب المصري والراب في اسكندرية على وجه الخصوص. ميدو بيمثل وبيعرف المعنى الحرفي للأندرجراوند...
ودي الكلمة الل معظم الرابرز بتوع اليومين دول بيخافوا يشوفوها لإنها ممكن تضرهم في أكل عيشهم وتعمل لهم صورة وحشة في الميديا. طبعًا الناس اللي لسة داخلين السين جديد مش مدركين إن في حاجة كلنا زمان كنا بنرددها وهي إن الراب ده فن ضد الميديا وفن شارع وبس.
Anti Media Art
بس ما علينا، خلي الناس تاكل عيش...
ميدو كان زعيم حركة أحفاد اسكندر الخفي ومؤسس لكام باند ماكملوش لوقت طويل زي ما أدهم غوريلا أسس ولاد الحي وعشيرة غوريلات وشارك في باندات تانية لكن الاستقرار بيحصل متأخر. العزبة قبل ما يستقروا كانوا برضه متفرقين كل واحد في باند والتسعتين والناس اللي خرجت منها واللي ماكملتش وعرب ليج وآرابيان نايتس ورومل بي وعدم الانحياز ومليون مليار باند وفرقة تانيين وبرضه الرابرز الشعبويين زياحمد ناصر ودوشة في دربكة ويوسف جوكر في كايرو تيم.
أحفاد اسكندر خرج منها محمد بيسو وعفروتو وباتيستوتا وناس غيرهم كتار لكن اللي اتشهروا هم عفروتو وباتيستوتا وبيسو نوعًا ما نال حظه من الشهرة. ميدو كان رابرز مميز ولكنه لم ينل الحظ الكاف من الشهرة بس هو ماكانش مهتم أصلًا برغم إن الراب سين كان يعرف مين ميدو إبليس كويس. باتيستوتا ليه تراكات كتير مع ميدو ولما اتوفى نعاه هو وعفروتو وبيسو وناس كتار تانيين...
الله يرحمه.
التالت هو يوسف موكا الباتل رابر اللي كان بيعمل بالات في راب أور ضاي... وهو أصغرهم سنًا وكانت ليه باتلات مع راب أور ضاي ومالحقش يقدم تاريخ طويل من الراب لكن هو أكيد في مكان أحسن. تحياتنا للجميع
المحتوى هو أرشيفي بالكامل. لو في أي شيء يخصك ومش حابب إنه يظهر تواصل معانا فورًا وهنحذفه. إحنا مش قاصدين نرخم على حد. شكرًا ليك
...