مساء الخير على كل الناس، في كام سؤال كده هنجاوب عليهم في بوست واحد منعًا للحرج اللي بنقع فيه وعشان برضه اللي كان بيدور في ذهنه الأمر وحابب يعرف.
*ليه في أكتر من مرة كنتوا بتشتموا ناس وناس بتشتم فيكوا وليه ماسبتوش اللي يشتم يشتم وخلاص؟
-إحنا بنحب نقفل القناة ومفيش أي مشاعر سلبية في قلوبنا تجاه أي حد، ولو حد شتم حد من القناة ومارديناش عليه ده هيسيب أثر سيء وضغينة وكراهية تجاه الشخص اللي شتم يا إما هيسيب كسرة عين. وإحنا الحمدلله لا عايزين الواحد ينام وهو شايل من حد ولا عيننا بتتكسر. ف معاركنا ومشاكلنا بنخلصها وقتي وكل واحد يروح لحاله وطبعًا أي حد حصل بيننا وبينه سوء تفاهم ياريت مايكونش متضايق أو زعلان لإن إحنا ما بنبدأش بالغلط مطلقًا وبنكون حذرين جدًا بخصوص النقطة دي
*ليه اسم إكس بالذات مع إن في ناس كتير أساميها بتتضمن نفس الحرف بشكل بارز؟
-في شخصين في الراب سين تضمنت أساميهم حرف الإكس Ahmed X-Ray - Sy xs
لو الرابرز الاتنين ممكن حد يناديهم اختصارًا بإكس ف ده مش ذنبنا بقى معلش هههه لكن إحنا إسمنا الحرف ده بس والسبب يرجع لإننا مش عايزين حد يعرف إحنا مين أو شخصياتنا وهوياتنا الحقيقية في الواقع لإن الموضوع بالنسبة لنا مش بغرض الشهرة أو الصيت لينا لكن للبراند نفسه وللمنظومة نفسها. لكن مستحيل نفرض نفسنا على الناس مرتادي ومحبي ومتابعي القناة بحجة إننا "أصحاب" أو مؤسسين القنوات لإن ده مش من حقنا وطبعًا الحرف ده في الرياضيات والعلوم التطبيقية والمادية أو المعملية ممكن يكون بيرمز للحاجة اللي مالهاش إسم محدد أو صورة معينة وخلافه وبيعادل في العربي حرف س
*اشعمنا الأستاذ إبراهيم نصر؟
-البراندينج اللي إحنا بنسعى له من سنين والاستراتيجية اللي بنتخذها في تقوية شوكة البراند الخاصة بينا وسط السوق اللي كله ناس بلاستيك وبيحاولوا يقنعوا الناس بإن الألوان الزاهية والمبهرة والموضة السريعة ووسط ناس بعيدة كل البعد عن الموضوع ووسط مزيكا كلها محدثين لازم يتم تنضيف الحياة منهم مش بس الراب سين المصري وبالتالي الراب سين في الشرق الأوسط... اخترنا شخصية مهدور حقها، نقية بالفطرة، نضيفة وبعيدة تمامًا عن الزيف اللي حاصل وبيحصل ومع الأسف هيحصل. الأستاذ إبراهيم نصر فيديوهاته بقت تاخد عدد ديسلايك كتير بعد ما توفى الله يرحمه لأسباب طائفية وأسباب ليها علاقة بثقافة دخيلة علينا ومش عايز أزود في الكلام عشان الموضوع ماياخدش منحى تاني وتدخل ناس تعلق تعليقات غير سوية على شخص إحنا بنكن له كل الحب والتقدير والاحترام. الأستاذ إبراهيم نصر ماكانش بيقدم نفس الكوميديا اللي بنطمح لها وبنحب نتواصل عن طريقها مع الناس اللي بيبادلونا مشاعر طيبة... لإننا مانجيش ذرة في البحر الكبير ده اللي ما أخدش حقه ولا وهو حي ولا لما ربنا اختاره ويرحل. الكاميرا الخفية اللي فضلت تتقدم لمدة طويلة وعلى مدار عشر سنين متواصلة، كانت بتدخل بيت كل الشرق الأوسط. وماكنش حد بيشوف تهجم أو تهكم او معاملة سيئة ورد فعل وحش من الأستاذ إبراهيم نصر لإن طبعًا مش هينفع الشخص اللي انا عامل في المقلب أو الهزارة دي أو الحركات دي بغرض الضحك والترفيه عن كل الأطراف أرد عليه رد سيء أو ما أحبش رد فعله زي رامز جلال لما "يزودها" معايا لإنه هيقبض بعد الحلقة اللي هو عارف إن هي مقلب من الأول. في برنامج مقالب لشخص خليجي كان معاه بادي جاردات ولما الضيف اللي بيتعمل فيه المقلب يزودها في رد الفعل..البادي جاردات بيكتفوا الضيف وممكن يضربوه. في برنامج مقالب لشخصين من اللي بيقولوا على نفسهم إنفلوينسرز عمرو راضي ومحمد فرج، عملوا مقالب في ناس ولما كان حد بيحاول ياخد حقه أو بيتطاول أو بيعمل رد فعل طبيعي ف محمد فرج بيكشم له وبيزعق معاه وممكن يعامله بقلة ذوق. من اجل كل هذا وقع اختيارنا على البراند الأستاذ الجراند إبراهيم نصر، إحنا كل ما في الامر إننا بنهزر مع الرابرز والراب سين برمته، بنتفرج وبنضحك وبنحاول نخلي كل الناس تضحك معانا، وفنفس الوقت الدراما لما تظهر تكون حقيقية بقدر الإمكان ومن غير تجريح أو إهانة أو غصبانية على حد بعينه ولأي سبب كان. الموضوع بالنسبة لنا زي الحياة، هم كام سنة الواحد بيعيشهم ومش هنعيش الكام سنة دول نرخم ع الناس أو نكون تقال او نبقى متزوقين ومبهرجين وبلاستيك... عادي يعني، هنقضيها ونتكل على لما وهنسيب بس التاريخ ده بشكله بعبله بحلاوته بوحشاته عشان كل رابر وكل فان للفن ده يعرف مين كان ايه وايه وصل مين لفين وازاي فلان عمل ايه بكام وإجابات تانية كتير.
*ايه أكتر حاجة زعلانين إنها حصلت في القناة؟
-في مرة لما القنوات القديمة بتاعتنا كبرت بشكل ملحوظ وعملت ملايين المشاهدات، ناس كانت آخدة مننا مقاطع وفيديوهات وأعادت نشرها بطريقة أو بأخرى، ف إحنا مابنعملش سترايكات لأي حد لأي سبب كان. ولما بيتقال لنا في المحتوى المعاد نشره وبنتسأل (لإن انت بيكون عندك الاختيار) هل عايزين نعمل سترايك ولا مجرد تحذير بمدة معينة وبعدها سترايك ولا نسيبه عادي... كنا بنبعت رسالة لو فيديو يخصنا إحنا وبنتواصل مع صاحب المقطع وكده كده بنحاول على قد ما نقدر الفيديو وصاحبه مايتضروش يعني. أو بنكلمه في خارج نطاق اليوتيوب وإدارته وبنعرض عليه التعاون وخلافه ومش مساومة والله هههه لكن بالحب ومادام بيدخل عندنا القناة فيتعاون معانا يعني ونتبادل المعلومات. لكن بالغلط في مرة عملنا سترايك لواحد فلبيني أو تايلاندي مش فاكر بالظبط. لكن القناة بتاعته كانت مليونية وكبيرة جدًا وكان آخد فيديو جرافيكس يخصنا بالكامل لكن مع الأسف الموضوع كان بضغطة زرار وماكناش لسة عاملين حسابنا على ال retraction وسحب الإبلاغات والسترايك والقناة اتقفلت بعديها بفترة قصيرة جدًا وان شاء الله مايكونش زعلان مننا .
*ايه الخطوط الحمرا في القناة؟
-إن حد يطلب إن محتواه يتشال، الحاجات اللي ممكن تعمل فتنة طائفية والكلام في السياسة... والطفل. أي شيء ليه علاقة بالطفل أو بيتضمن إساءة أو إهانة لطفل او حاجة بتمس حقوق الأطفال بنبعد عنها نهائي+إننا قافلين كل فيديوهاتنا ع الأطفال ومانعين إن فيديوهاتنا تظهر للأطفال. ف اللي بيشوفوا قنواتنا بيبقوا حوالي من 15-16 لما فوق يعني وممكن 14 في بعض الأحيان وبنحاول نشوف حل وسط كمان لإن اليوتيوب يا إما كده يا إما يبقى المحتوى كله للبالغين مساواة ومناصفة مع المحتويات الخطرة والحاجات اللي هي للكبار والكلام في الجرايم وخلافه... وإحنا مش في الشريحة أو الفئة دي. ف بنحاول نشوف حل.
*ايه الحاجات اللي مش عايز الناس تستغرب منها ع القناة؟
-لو نشرنا حاجات ليها علاقة بالضيب ويب. أو نشرنا حاجة تتضمن صورة ضيب ويب لفنانين او ممثلين أو مشاهير، وده أصبح متعارف عليه دلوقتي بين أوساط الشباب على عكس زمان أيام بدايات الملتقى ودولن وكن ب*ضينًا والكلام ده. *مين اللي ساعدموا ومين خذلكوا؟ -أي حد خلقه ربنا انا زعلان منه هههه لأ، الحقيقة في رابرز كتار تضامنوا معانا زي إف كيلا وعطوة وليل أيمن بيبي والخطاف هوك ولكن في ناس برغم إنهم استفادوا من القناة وعرفوا داتا ومعلومات عن رابرز كانوا معاهم في بيفات وخلافه إلا إنهم مابيردوش غير على الرسايل اللي جنبها علامة زرقا.
*جت لكوا سترايكات من مين؟ مين اللي عمل لكوا بلاغات؟
-حفاظًا على السرية والخصوصية، مش هنقول أسامي الناس اللي عملت سترايك وتواصلنا معاهم عن طريق الهاتف النقال أو ردوا علينا وخلصنا الموضوع بسلاسة وود. لكن من أشهر الناس اللي عملت لنا سترايكات:
Takwene تكوين (ماردوش علينا)
مولوتوف Molotof (ماردش علينا)
شركة ماسكة شغل مولوتوف (ماردوش علينا)
الزعامة عادل شكل ههههههههه Adel Shakal
ما كلمناهوش الصراحة ولا حاولنا نتواصل معاه برغم إنه أكيد هيشيل السترايك بس إحنا كنا آخدين فيديو للزعامة وهو بيرقص في الشارع وحاطينه مع أغنية الزربتك لباتيستوتا في إحدى قنواتنا وأكيد هو زعل او اتضايق وبنعتذرله جدًا ويارب ما يكون زعلان مننا.
وحد لسة مش عارفين هو مين لحد دلوقتي لإنه عمل سترايك تالتة ودي انت مابتشوفش بعديها نور وبتلاقي كل حاجة ضلمت.
بس مش مشكلة.
وأقول قولي هذا وأترك البزازة وتحياتنا للجميع
المحتوى هو أرشيفي بالكامل. لو في أي شيء يخصك ومش حابب إنه يظهر تواصل معانا فورًا وهنحذفه. إحنا مش قاصدين نرخم على حد. شكرًا ليك
...